自家其土地，汝有行透未？（福州語）

有蜀回放假著厝辰候，共朋友攀講講遘旅游計劃，我就講：“若有閑，第一想將閩江由頭遘尾行透，由建寧閩江源直頭行遘閩江口五虎礁。是總款蜀回旅行，無十工行賣完，時間實在無。”伊聽了，講：“我無甚乇興趣。有茲時間，固是去外省名勝客調。”伓是我見覺其他位處無仂囝意思，㑚是自家骹底茲土地有茲夥有味其位處我固未了解，有茲時間，固是無辜負茲塊神奇其土地，使自家其雙骹去實實在在了解伊。㑚退悔做細佮厝未多行，仱著茲遠也無再夥機會，㑚忖偌工轉去，好好行伊蜀環，將許閩北閩南閩東閩西，榕泉漳汀，甚乇土樓、廊橋、宮廟、大厝、茲江許溪、茲山許嶺，統統行透。許，無一定著使我蜀世時間，㑚因茲地是茲般深厚。